NY Cheesecake

Gati 10 vite më parë u vura seriozisht në kërkim të një cheesecake të vërtetë në Tiranë. Në atë kohë gjeta dy vendet që e ofronin: Qendra Stefan që bënte versionin e pjekur dhe Artisti që bënte versionin e pa pjekur. Edhe pse eksperienca krejt të ndryshme, për kohën dhe kufizimet që kishte tregu, ishin alternativa të mira. Më pas cheesecake u bë i famshëm. Shumë i famshëm. Kaloi nga “çfarë është kjo torta me djathë” në “cheesecake me shegë” në çdo menu, dyqan a furrë buke.

Ka plot raste kur disa pjata specifike përjetojnë një cikël jete të ngutshëm, ku stërpërdoren aq shumë sa në mënyrë graduale bëhen të papëlqyeshme dhe bien në harresë. E keqja është që gjatë këtij cikli shpesh nuk arrjmë të njihemi me recetën e vërtetë pikërisht për shkak të keqinterpretimeve që i bëhen.

***

Mbaj mend që gjatë kohës që bëja kërkimet e mia për cheesecake-un ideal kam provuar lloj-lloj versionesh. Me gjizë, me maskarpone, me krem djathi, me pana, me xhelatinë, pa xhelatinë, me salcë kosi, me pluhura të konservuar apo me çdo nënprodukt qumështi të mundshëm. Pothuaj të gjithë jo të pjekur dhe shumica larg atij tipik. Sepse, kur flas për Cheesecake, në fakt, gjithmonë fjalën e kam për versionin New York style.

New York cheesecake, është një ëmbëlsirë e ngulitur në kulturën amerikane prej dekadash dhe është padyshim një recetë klasike. Mendohet që origjinën e ka nga Greqia dhe Roma e lashtë, e më pas është përhapur e ndryshuar deri sa ka mbërritur në Amerikë, për t’u kthyer në një simbol. Por nuk dua të ndalem në histori. Dua të veçoj dy tiparet kryesore që e dallojnë nga të tjerët dhe e bëjnë më kompleks. E para, pjekja e ngadaltë në banjë-mari, që e bën më të trashë, më të shkrifët dhe i jep një ngjyrë të verdhë të lehtë. E dyta, raporti dhe cilësia e kremit të djathit. Jo çdo lloj kremi djathi vlen për një rezutat të mirë dhe NY Cheesecake ka nevojë për shumë yndyrë për të krijuar atë lloj poroziteti dhe shkriftësie. Natyrisht ky version ka shumë më tepër punë dhe kosto e tij del shumë e lartë. Besoj që këto janë dy arsyet përse është ende aq i rrallë tek ne ky version.

Në fund të këtij shkrimi, do të gjeni recetën origjinale të një prej restoranteve më të njohura në New York për Cheesecake. Receta e Junior’s e marrë nga libri i tyre, nuk më ka zhgënjyer asnjëhere, as atëhere kur ky ishte impenjimi im kryesor. Ata që e kanë provuar cheesecake-un tim dikur e dijnë për çfarë e kam fjalën.

Përveç versionit klasik, te shpeshta janë variantet pa pjekje (no-bake cheesecake) dhe së fundi edhe Japanese cheesecake po tërheq vemendjen dhe po përhapet me shpejtësi.

No-bake cheesecake është një variant i njohur dhe i përhapur sepse është i shpejtë dhe i lehtë për t’u realizuar. Natyrisht shija e kremit të djathit edhe në këtë rast jep rezultat shumë të pëlqyer. Vetëm që mos-pjekja pengon atë rezultatin kompleks të shijes. Tekstura gjithashtu është e ndryshme duke anuar me shumë tek kremoziteti se sa tek shkriftësia. Rezultati është i mirë padyshim, por thjesht nuk është NY Chesecake.

Japanese Cheesecake është një tendencë e re që e sjell NY cheesecake në një formë edhe më të ajrosur dhe të lehtë. Mendohet që të jetë i përshtatur me shijen Japoneze duke shtuar në recetë më shumë vezë dhe marenge për efektin super të fryrë duke eleminuar edhe bazën e biskotave të ngjeshura. Gjatë vizitës time në Japoni në fakt provova edhe një version Cheesetart. Jo një cheesecake klasik në paraqitje por shumë e ngjashme në konsistencë.

New York Cheesecake

Print Recipe

By Junior's Serves: 8 Prep Time: 30 Cooking Time: 1 orë

Ingredients

• Për bazën:
• 200gr biskota Digestive
• 60gr gjalpë i shkrirë
• Për kremin:
• 3 kuti 300gr Philadelphia klasike (në temperaturë ambjenti)
• 1 2/3 kupa sheqer (rreth 200 + 130gr)
• 1/4 kupë niseshte (rreth 30gr)
• 1 lugë gjelle vanilje lëng
• 2 vezë të mëdha
• 3/4 kupe pana kuzhine jo e ëmbëlsuar (rreth 200ml)

Instructions

1

Vendosni një tavë të madhe në furrë me rreth 2 gisht ujë në 180 gradë. Brenda kësaj tave do të vendoset tava e cheesecake.

2

Visheni tavën e cheesecake me letër alumini disa herë që të mos i hyjë uji gjatë pjekjes.

3

Bluajini biskotat ne mikser dhe shtojini gjalpin e shkrirë.

4

Shtrojini në tavë dhe shtypini mirë për të krijuar bazën.

5

Vendoseni në furrën e ngrohur për pak minuta.

6

Në një tas të madh vendosni një kuti Philadelphia, 2/3 kupë sheqer, dhe niseshten. Rrihini me mikser.

7

Shtoni kutitë e tjera të Philadelphia një nga një dhe shtoni 1 kupë sheqer dhe vaniljen. Rrihini me mikser me shpejtësi pak më të lartë.

8

Shtoni vezët një e nga një dhe më pas panan. Përziejini deri sa të jetë krijuar një masë homogjene.

9

Hidheni në tavë mbi bazën e pjekur.

10

Vendoseni në banjë-mari në temperaturë 180 gradë për rreth 1 orë deri sa të ketë marrë një ngjyrë të kuqërremtë.

11

Pas pjekjes lereni të ftohet për rreth 2 orë në temperaturë ambjenti.

12

Vendoseni në frigorifer për të paktën 4 orë ose gjatë natës

13

Shërbejeni me fruta të freskëta apo reçelin tuaj të pëlqyer.

Notes

Me kupë apo lugë nënkuptoj gjithmonë masat matëse amerikane Cups dhe Spoons që janë matje standarde. Janë sete masash që lehtësojnë matjet në shtëpi. Megjithatë për lehtësi një pjesë i kam rrumbullakosur në gramë) Bazën e këtij cheesecake e kam përshtatur për një rezultat më krokant dhe më të lehtë. Shpesh mund të hasni termin Graham Crackers për bazën e cheesecake. Versioni më i ngjashëm që gjendet në tregjet tona, janë biskotat Digestive.