Informacion/ Ku të shkojmë?

Let’s brunch again

Kanë ndryshuar kaq shumë gjëra nga ky shkrim i para një viti për sillën (ose brunch) sa vendosa të shkruaj një të ri.

Sa herë mendoj për brunch, gjithmonë më kujtohen dy vende, tashmë të dy të mbyllur, që ofronin sillë të shkëlqyer përpara se të ishte kaq në modë. Në fakt të dy këto vende ishin restorante të mira, që drejtoheshin nga persona që e njihnin mirë ushqimin dhe gatimin, që i qëndronin vetë biznesit në kokë dhe që mbi të gjitha nuk besonin tek forma por tek përmbajtja. Për fat të keq që të dy u dorëzuan përpara një klientele që kërkon saktësisht të kundërtën.

DTown, për të cilin kam folur këtu përpara disa vitesh, ishte i pari vend që ofronte një menu brunch të mirëfilltë, me pjata të zgjedhura dhe ekzekutuara në mënyrë plotësisht korrekte. Akoma nuk e kam pranuar humbjen e tij dhe ende më shkon mendja për vezët Benedikt të shoqëruara me hash browns, për tortën me mollë dhe koktejlet mimoza buzë asaj rrugës së bukur.

Vezë Benedikt & tost francez @DTown

Tortë me mollë @DTown

Edhe për Pallati 11 kam shkruar përpara se të mbyllej, madje pikërisht tek shkrimi i përpara një viti. Të dielën kur po endesha për të gjetur vendin e duhur për brunch, e ndjeva edhe njëherë mungesën e vezëve Benedikt tek Pallati, me bukën e bërë vetë, kaq të butë, me koren kërce apo për vezët me shparguj që ende s’i kam gjetur kund tjetër.

Vezë me shparguj @Pallati 11

Tani që edhe Pallati 11 u mbyll, dhe po kthehet në lloto, mund të kthehemi qetësisht tek ekranet tona të celularëve, dhe të shkojmë aty ku na servirin ushqime pa shije, por që ama duken bukur.

Që të mos keqkuptohemi, nuk jam kundra ushqimeve të bukura, nuk do të mund të isha kurrësesi, duke qenë se një pjesë e punës time është të fotografoj pjata :), por shija dhe ekzekutimi duhet të vijnë përpara pamjes. Le të themi që në shkallë vështirësie të gatuash me shije nuk është saktësisht e njejta gjë si të servirësh një pjatë të bukur.

Po tani ku të shkojmë?

Tani le të kthehemi tek vendet që ende servirin brunch në ambjente gjysmë të hapura, tamam për pranverë.

Bufe: Për Bufe kam shkruar edhe më parë. Më pëlqen jashtëzakonisht oborri i vogël, atmosfera e qetë dhe e rehatshme. Nuk më pëlqejnë shumë vezët Benedikt sepse u mungon salca hollandaise që është pikërisht salca që i bën vezët Benedikt dhe jo bukë me vezë me sallam. Kurse këto petullat që tashmë ofrohen në disa lokale për brunch, janë shumë të mira për të shëruar një hangover.

Petulla @Bufe

SALT: SALT ka momentalisht menunë më të pasur të brunch në Tiranë. Pjata shumë interesante dhe tipikisht përfaqësuese si petullat amerikane (pancakes), vezët Benedikt, tosti francez, granola, omeleta, waffles etj. Unë provova vezët Benedikt si një klasike e menusë, por kishte një mungesë të theksuar ekuilibri midis pamjes dhe shijes. Nuk arrij vërtet të kuptoj se si ambjenti më ‘glam’ në Tiranë mund të shërbëjë një pjatë kaq pak tërheqëse që i mungon tërësisht eleganca që kanë pjatat e tjera. Megjithatë, ende mendoj që është zgjedhje shumë e mirë për brunch.

Vezët Benedikt @Salt

Artisti: Artisti i ka rezistuar viteve dhe mbetet një prej vendeve që vizitoj shpesh për mëngjes ose sillë. Menuja ka shumë pjata që vlejnë për mëngjes dhe brunch, si omeleta, bukë me vezë, petulla etj. Aty, zakonisht porosis pancakes sepse vijnë të shërbyera me plot fruta dhe janë të përgatitura shumë mirë.

Pancakes @Artist

TeDuKtu: Kam shkruar me shumë detaje për brunchin tek TeDuKtu ktu, prandaj nuk dua të bie në përsëritje.

Qendra Stefan: Ka një menu të plotë dhe mundësi zgjedhjesh, por vezët Benedikt këtu nuk janë më të mirat që kam ngrënë. Vezët ishin të gatuara shumë, dhe ajo domatja mes vezës dhe proshutës më tepër i prishte shijen se ia rregullonte. Vazhdoj të jem kundra shtesave të panevojshme në recetat klasike. Po ashtu edhe qumështi i kapuçinos ishte tepër i ngrohtë (lexoni këtu për një rikujtesë) dhe torta me mollë paksa e thatë. Me një fjalë, pak përpjekje më tepër nuk do bënte keq.

Vezët Benedikt @Qendra Stefan

Vezët të gatuara më tepër se duhet

Apple crumble @Qendra Stefan

The home social: Tek home ka disa pjata mëngjesi përfshi edhe vezë në forma të ndryshme, apo pancakes e petulla, por ajo që mendoj se bën ndryshimin tek The Home është pjesa e Viennoiserie, dmth croissants dhe pain ou chocolat për të cilat kam shkruar edhe këtu.

Pain ou Chocolat @The Home Social

Për mbyllje, i japim lamtumirën edhe Funky Moustache, i cili pas shumë vitesh dhe tentativash i mbylli dyert para pak kohësh. Kur shkova herën e fundit, kishte një ndryshim pozitiv nën menaxhimin e një çifti të ri plot me ide, të cilët edhe pse qëndruan një kohë të shkurtër, i dhanë pikërisht atë vizionin e munguar që në krye të herës. Vendi u gjallërua dhe për pak kohë u krijua një traditë për mëngjesin me disa produkte të thjeshta por të vështira për t’u gjetur si ky tosti me avokado që shumëkush do e përkufizonte si ‘pa hile’ dhe plot shije.

Avocado Toasts @Funky Moustache

 

You Might Also Like

2 Comments

  • Reply
    Ledia
    April 27, 2018 at 9:46 am

    Ke harruar te kalosh nga Neps. Not at all bad for brunch 😉

    • Reply
      ingridxh
      April 27, 2018 at 10:29 am

      Nuk e dija që bënin edhe brunch tek Neps. Në fakt kam shkuar vetëm një herë atje (dhe një herë në Durrës) por nuk jam fort e bindur për të.

    Leave a Reply